JOXEMARI ITURRALDE

JOXEMARI ITURRALDEREKIN SOLASALDIAN

Orain dela gutxi, apirilak 18, Bidebarrietako liburutegira joan ginen Joxemari Iturralderekin solasaldi bat izateko. Ikastetxetik goizeko 9:45etan irten ginen eta bi ordutan egon ginen berarekin. 

Bigarren ebaluazioan irakurri genuen liburua “Santiago bidean” izan zen eta liburu horri buruz hitz egin zigun Joxemarik.

Hasteko, bi motatako idazle daudela azaldu zigun:

-        Julio Verne bezalako idazleak: etxetik irten barik idazten dutenak eta… 

-   Ernest Hemingway bezalakoak: bidaiak egin ondoren, izandako esperientzietan oinarrituta idazten dutenak.

Joxemari bigarren taldean sartu beharko genukeela esan zigun, Santiagorako bidea egin eta gero idatzi baitzuen “Santiago bidea” liburua.

Hitzaldian azalpenak eman bitartean, hainbat diapositiba erakutsi zizkigun eta Done Jakue bidea egiteko aholku batzuk eman zizkigun, honako hauek adibidez:

 

-     Motxilaren pisua gure pisuaren hamarrena izan behar da. Beraz, motxila egiten bukatutakoan, berriro hustu eta sartu duzunaren erdiarekin geratu behar zara. 

 -    Ez eraman bota berririk, min egin ahal dizutelako. Kontuz! Ozperak atera dakizkizuke!

-      Adi egon seinaleekin, gal zaitezke eta.

-     Bi motatako pertsonak aurki ditzakezu bidean: diru piloa eramaten dutenak eta dirurik gabe doazenak. Dirua eramaten dutenek jatetxeetan bazkaltzen dute eta dirurik ez dutenek bidean zehar aurkitzen dute janaria, beste batzuek utzitakoa.

-     Adi egon behar da iturriekin, deshidratatu ahal zarelako. Bidean zehar hainbat iturri aurkituko dituzu.

-     Ostatura heltzen zarenean, ez badago lekurik, kalean lo egin beharko duzu (gomendagarria da lo-zakua eramatea).

-        Ezin zara oso berandu oheratu, goizeko 7.00etan ostatutik botatzen zaituztelako.

-        Arropa bakoitzeko gehienez bi pare eraman.

-        Erromes ostatura ahalik eta azkarren heldu behar duzu lekua aurkitu ahal izateko.

-        Beste erromesengana lasai hurbildu, agian bakarrik joan nahi dute!

-     Goizeko bostetan altxatu, bidean berorik ez izateko, eta eguneko etapa bukatzeko denbora nahikoa izateko.

Gero, bere beste liburu bat aipatu zigun Joxemarik: “Jack Destripatzailearen Arrastoa”. Gutako batzuk irakurtzen hasi gara eta interesgarria dirudi.

Liburua benetako gertaera bati buruzkoa da, baina bere erara kontatzen du istorioa.

Liburuaren protagonista euskaldun bat da, Londresera doana gero Ameriketara joateko. Baina Londresera heltzerakoan zeukan dena lapurtzen diote, eta taberna batean lan egin behar izango du Ameriketara joan ahal izateko. Han dagoen bitartean, Jack Destripatzailea bereak egiten hasiko da.

Zenbait gauza kontatu zizkigun bere lanari buruz, idazketari buruz, bizitzari buruz…  eta irakurtzeari gustua hartzeko, geuk aukeratutako liburuak irakurtzeko gomendatu zigun, gure gustukoak beti.

Bukatzeko, gazte suitzarrek bost hizkuntza dakizkitela esan zigun Joxemarik. Geuk ere, haiek bezala, HIZKUNTZA BAT BAINO GEHIAGO IKASTEKO eta GUREA ZAINTZEKO gomendatu zigun.

Alde egin baino lehen, gure liburuak sinatu zizkigun eta berarekin argazkiak ateratzeko aukera izan genuen. Hurrengorarte Joxemari, ondo pasatu dugu!!!

  3. DBHko ikasleak