SOLOKOETXETIK 7 KATU GAZTETXERA!

SOLOKOETXETIK 7 KATU GAZTETXERA!

	Urte berezia izan zen 2006 garai hartan Solokoetxen ikasten genuenontzat. 3. Mailan geunden garai hartan eta gure bizitzaren nondik norakoa markatuko zuen momentu eta ekintzaz beterik ageri zen gure egunerokotasuna. 15 urte bete berritan gauza ugari deskubritzen hasiak ginen. Gazteak izaten hasi berriak ginen eta hiri arraroa zen ordurako Bilbo guretzat.
Iturribideko kaleko giroari esker jendea asko ezagutzen hasiak ginen eta bestela gure auzoetan paseoan ibiltzen ginen beste ezer hoberik egin ezean. Klaseak, entrenamenduak, asteburuetako errutina...
Garai hartan Gazte Asanblada berria biltzen hasia zen Alde Zaharrean. Auzoko egoera aldatu nahian, eta bi urte lehenago deslojatua izan zen Sorgintxulo eredu harturik, gazteon aisia eta problematika landuko zituen gune aske baten bila hasiak ziren. Eta horrela etorri zen Unamuno
plazako Geltoki gaztetxea. Gaztetxea zer zen ongi ulertzeko denborarik gabe, 4 egunen buruan deslojatua izan zen metro sarreraren gainean dagoen eraikina, jada ez zen atzera bueltarik. Hasieran aurpegi arraroz begiratu genion lokal horrek gure jakin-mina piztu zuen, nahiz eta ez genuen bertaratzeko aukerarik izan. Okupazioaren hazia sendo piztu zen Alde Zaharreko gazteen buru eta bihotzetan, eta auzoa eraikitzeko eta biziberritzeko asmoak geldi ezinak bihurtu ziren. Urte bete eskas pasata okupatu zen Unamuno plazan 7 Katu I izena jaso zuen gaztetxea. Solokoetxeko lehenengo mailan geundela deslojatu zuten Karmelo plazako Sorgintxulo gaztetxea. Kuriosidadez eta penaz ikusi genuen ia ezagutzeko denborarik izan ez genuen lokal horren desagertzea, baina argi utzi zigun bezela gazteontzako eskaini zitekeen beste aukera bat, oraindik ez genekien zehatz zer, baina zeozer bazen. Unamunoko BBK gainean dagoen pisua guztiz egokia izan zen guretzat. Klasetik etxera bidean gindoazela gure aurrean aurkitzen genuen egunero, ateak parez pare, klasetik atera eta burua askatzeko aukera eskainiz. Bizi laburra izan zuen lokal honek, baina kalkula ezina da gure 15 urteko buruetan izan zuen eragina. Gaztetxe bat zer den ulertu genuen. Ilusioa, gure aisia sortu eta antolatzeko gogoa eta aukera ikusi genuen, eta ordutik ezin izan genuen gure auzoa beste era batean ikusi.
	Gaztetxeak erresistitzea lortu zuen 12 egunetan agerian gelditu zen Gazte Asanbladaren indarra, eta denbora gutxian, atondu zuten urteak eta urteak hutsik zeraman pisua. Ikastaroak, kalejirak, bazkariak, antzerkiak... Ordurako ez zen dudarik Alde Zaharrean Gaztetxe baten beharra aldarrikatzeko.
Jolastordu batean geundela ikusi genuen 7 Katu I gaztetxearen desalojoa. Korrika igo ginen patio gaineko terrazara eta bertatik  kasko gorri ñimiño pila ikusi ahal izan genituen Unamuno plazan. Sentimendu berezi batek hartu gintuen guztiok. Ertzainek ateari emandako kolpe bakoitzak, Solokoetxeraino iristen zen sirena eta oihu bakoitzak 12 egun horietan bizitako momentuak ekartzen zizkiguten gogora. Pisua atontzen pasatako orduak, ezagututako jende berria, ikasitako eta bizitako esperientziak... Benetan mingarria izan zen egun hura. Amorrua eta tristurak ilusioa eta lanerako gogoari eman zioten bidea, ez zegoen atzera bueltarik. Esan beharra dago gaur egunean ere hutsik jarraitzen duela pisu honek.
Urtebeteren buruan Unamunon egin- dako lanaren fruituak ikusi ziren. 2007ko urtarrilaren 13an  Solokoetxeko eskailera- tan dagoen lokala okupatu zuen Alde Zaharreko Gazte Asanbladak. Berriro ere institutu ondoan bertan genuen ordutik hainbeste gauza erakutsi dizkigun hori. Alde Zaharreko 7 Katu II gaztetxea.
Asko bizi izan dugu ordutik. Hasiera batean gaztetxea “kanpotik” disfrutatzetik, gaztetxearen funtzionamendua gero eta gehiago ulertu eta horretan parte hartzera pasa gara. Kultur eskaintzak lotzen, kritikoak izaten edota jaiak lotzen ikasi dugu... bakoitzak bere neurrian asko garatu gara. Oraindik gogoan ditut 100 pertsonentzat egin genituen lehen makarroiak ! (nahiz eta orain ere ez ditugu askoz hobeto egiten...). Bizi izan ditugun 4 desalojo eta 5 okupazioek ere asko irakatsi digute. Gure nahiak garatzeko ditugun zailtasunak ikusi ditugu, baita ondo egindako lanak instituzioengandik duen erantzun zuzena ere. Kritikoak izaten lagundu digute eta edozertarako kapaz garela ere ikusi dugu. Inoiz ez dugu ezer galdutzat eman eta burugogorkeria eta ilusio  horri esker zutik dirau gaur egun 7 Katu gaztetxeak.
	Gaztetxeak bete berri dituen 5 urte hauetan asko aldatu gara denok, pixka- naka bakoitzak bere norabidea hartu du, Solokoetxen eta baita lehenagotik ere lagunak ginenok zentro ezberdinetan aurkitzen gara gaur egun, ikasketan, lanean zein potrojorran. Hala ere gaztetxea dugu lanerako eta ikasteko eremu komuna eta nola ez beste jende berri asko ezagutzekoa.
Labur esanda, zaila egiten da 5 urte hauek 7 Katu gabe imajinatzea. Eskerrik asko 7 Katu gaztetxeari eta bertan parte hartu duzuen guztioi! Solokoetxeko ikasle ohiak