AGATE DEUNA 2015

AGATE DEUNA, 2015

Gaur goizean, Solokoetxeko igogailutik irtetean, Alde Zaharrera begira geratu gara. Eguzkiak jotzen duenean, teilatu gorrien artetik Santiagoko dorrea zerurantz gailentzen ikustea polita da, dudarik gabe. Baina gaur ere ikuspegi ezin ederragoa aurkitu dugu: Santiagoko dorrea teilatu zurien gainetik. Elurra ez da ohikoa Bilbon. Horregatik gure mobila hartuta argazkiak egiten hasi gara denok, lagunei bidaltzeko, noski.

Gaur, Cataniako Agate Santuaren egunaren bezperan, Euskal Herriko ohiturari jarraituz, lehen mailako ikasleak eta irakasleak azken saioan kantatzera irtengo ginela gogoratu dut une hartan.

Ordu bat eta erdietan, makilak hartu, zapiak jantzi eta kalera irten gara. Zabalbidetik Erriberako Merkatura abiatu gara. Gure lehenengo kanta barruan egin dugu. Amaitu baino lehen, beste koro bat genuen zain tokia hartzeko. Handik Dendarikaletik Santiago plazara joan gara. Kantatzen genuen bitartean, elurra ari zuen. Hurrengo geldiunea Plaza Berrian egingo genuen. Hemen, euria ari zuenez, arkupeetan abestu dugu. Eta gero, pelikula famatu hartan bezala, Unamuno plazan euripean kantatu dugu. Lehen merkatuan ikasle baten ama agurtu dugu; orain plaza honetan ikastetxeko irakasle bat izan da gu agurtu gaituena.

Eskaileratik igo, eta patioan azken kanta egin ondoren, makilak datorren urterako gordez, ekitaldiari amaiera eman diogu. Gaurko eguna ez dugu inoiz ahaztuko, ez baita ohikoa Bilbon Santa Ageda elurpean kantatzea.

   

   

   

   

   

   

Seve Sánchez