2012/05/13

EUSKARAREN ASTEA

 EUSKARAREN ASTEA

12. Santutxu-Txurdinaga auzoetako euskararen astea eta Solokoetxe.

      Euskararen asteko 12.edizioa da aurtengoa gure auzoan. Auzoko elkarteek bultzatuta gure auzoetan hainbat ekitaldi ezberdin burutu izan ziren martxoan zehar. Datak urrun geratzen bazaizkigu ere, gure ikastetxeetan gogotsu aritu gara koordinazio lanak ondo burutzen. Lan honetan auzoko elkarteaz gain auzoan dauden ikastetxe publikoek zein pribatuek hartu izan dute parte.

      Atzera begira gure helburu horietako bat bete egin da, euskara geletatik auzoko kaleetara eraman dugu. Euskara kalean entzun da, erabili da, mota ezberdinetako ekintzak burutuz. Batzuk euskara ikastetxe barruan baino ez dute erabiltzen eta ekintza hauen bitartez mundu zabalago bat badagoela erakutsi nahi zaie ikasle zein gurasoei. Hau da, eskolatik kanpo euskaraz ere bizi daiteke.

      Aurtengo edizioan 6000 ikasle mugiarazi izan ditugu euskararekin lotutako hainbat ekintzen inguruan. Gure ikastetxeak DBHentzako antolatutako ekintzetan parte hartu du. Zeinetan? Rap euskaraz eta HIP-HOP emanaldian; “Buha txabal” antzerkian; Bertso saioetan eta Herri Kiroletan ere.

      Urtero bezala gure ikastetxean euskararen erabilera suspertzeko hainbat ekitaldi eta ekintza burutu ditugu: maitasunezko gutun lehiaketa; ”Euskarazetamol” antzerkia; euskal komikiaren historia laburra paneletan; Patxi Gallego komikilariaren hitzaldia; eskolarteko bertso lehiaketa eta euskaren etxeko komiki lehiaketan parte hartzea.

BERTSO SAIOA

      Euskararen asteko hasierako ekitaldia izan zen. Gure ikastetxeko ikasleak bi saioetan izan ziren: lehenengo mailakoak Solokoetxen eta bigarren mailakoak Txurdinaga Beheko institutuan.

      Ikastetxera lehen hezkuntzako 6.mailako ikasleak etorri ziren lehen mailakoekin batera bertsoak entzuten. Bertsolarien artean egungo Bizkaiko txapelduna den Arkaitz Estiballes, Onintza Enbeita eta Pello Ormazabal etorri ziren.

      Bertso saio bizia, zirikatzailea eta umorez betea eskaini ziguten. Saio honetan Bigarren zikloko ikasle bik jaso zuten eskolarteko bertso saria: Peru del Hoyok eta Irati Cabrerak.

      Txurdinagara joandako ikasleek maila eta ikastetxe ezberdinetako hainbat ikasleekin egin zuten topo. Bertara hurbildutako bertsolariak hauek izan ziren: Iparraldeko txapelduna den Amets Arzallus, Gipuzkoako txapelketan bigarrena den Beñat Gaztelumendi eta Bizkaitik Iratxe Ibarra.

      Saio hau serioagoa izan zen eta bertan gure ikasleek bertso arteko lehiaketan lortutako sariak jaso zituzten. Hauek dira Eskolarteko Bertso lehiaketako saridunak: Maialen Anakabe, Mikel Unibaso eta Amaia Fernandez.

      Zorionak guztiei.






EUSKARAZETAMOL ANTZERKIA

      Ekitaldi hau Bigarren zikloko 3.eta 4. mailetako ikasleentzat antolatu genuen. Patxo Telleriak eta Mikel Martinezek “BIKOTEATRO-TARTEAN TEATRO”ko partaideek aurkeztu zuten antzezlana.

      Hainbat ikasleen jarrera lotsagarria izan zen oso. Hitz egiten …egindako lanari trufa egiten…zarataka. Zenbait irakasleen ardura eskasa…eta aurten saioa txarto bukatu zen. Aktoreak ez ziren gustura aritu. Behin antzerkia moztu eta ikuslegoari errieta egin behar izan zion Mikel Martinezek. Kontzentrazioa galduta aktore batentzat zaila izaten da obra aurrera eramatea.

      Horrez gain, ikasleen artean zabaldu da iaz ikusitako lana bera ekarri dugula. Eta hori ez da horrela. Iaz ikusitako lana :”Euskara sencilloaren manifiestoa” izan zen. Aurtengo lana: “Euskarazetamol” izan da. Dena den…ikusita edo ez, antzezleak errespetu osoa merezi dute  eta haien lana errespetu osoz jarraitu behar dugu. Zer gertatzen zaigu?



MAITASUN GUTUN LEHIAKETA
           
      Ikastetxe osoa parte hartu du honetan. Hasierako pausuak eman ondoren ikasturte bukaeran egingo den ekitaldi batean jakinaraziko dizuegu irabazleak nortzuk diren. Blogean  eskegi nahi ditugu lanak eta horrela izan ezkero  irakurleek iritzia ere eman dezakete.

RAP ETA HIP –HOP EMANALDIA

      DBHko 1., 2. eta 3. mailakoentzat antolatutako ekitaldia izan zen. Aurtengoan Barakaldo-tik etorri zitzaizkigun rapero eta hip-hop dantzari gehienak. Haien artean auzokoa den Rayco zegoen. Norte Apatxe taldeko partaidea da hau eta Barakaldoko 121Krew-ekoekin aritu zen.
     
      Rap Kantariak, Hip-hop dantzariak eta gainerako lagunak, denak euskaraz aritu ziren. Ekitaldiari buruz iritzi ezberdinetako balorazioak jaso genituen…batzuei ez zitzaien ezer gustatu, estiloa gogokoa ez zutelako. Beste batzuentzat, ordea, oso ona izan zen.









HERRI KIROLAK
           
      3.mailakoak joan ziren Gabriel Aresti ikastetxera  herri kiroletako jokoetan parte hartzera. Taldean lan egin eta inguruko ikastetxekoekin harremanak sendotu zituzten.




KOMIKIA

      Euskararen astea komikiaren inguruan lotu nahi izan dugu aurten eta hori dela eta martxoan zehar hainbat ekitaldi antolatu genituen.

      Alde batetik lehen mailako ikasleek “girotze lana” egin zuten,. Haien esku egon zen gure ikastetxeko paneletan ikus daitezkeen horma-irudien lanketa. Euskal komikiaren historia laburra izan zen landu zuten gaia. Horma-irudi ikusgarriak prestatu zituzten eta gustura aritu ziren lanketa berezi horretan. Jarrai horrela!

      Beste alde batetik gure ikastetxean irakasle izandako Patxi Gallego komikilaria egon zen gurekin. Honek hitzaldi luze eta ederra eskaini zigun. Ikasle guztiek oso ondo baloratu zuten eta bertan izandako irakasleek ere oso gustura egon ziren. Esan behar dugu Patxiren lehen hitzaldia izan zela. Lan bikaina Patxi!!
     
      2.mailako ikasleak Euskararen etxera joan eta han komiki lehiaketa batean parte hartu zuten.Euskararen etxea ezagutzeaz gain jarduera interesgarria izan zen.

      Komiki lehiaketa egiteko asmoa genuen arren ez dugu aurten burutuko, hala ere datorren urterako komiki lehiaketaren nondik norakoak diseinatzen hasi gara.






BUHA TXABAL
           
      Unai Iturriagak sortutako lana eta aktore bakarreko antzezlana izan da hau. Gazte batek gaztetzeko giroa erakusten du honetan. Gazte hizkera eta ohiturak irudikatu ditu.

      Obra honek balorazio oso kontrajarriak izan ditu. Orokorrean ikastetxeen balorazioa oso ona izan da. Gurean, ordea, guztietan bezala ikuslearen arabera oso balorazio ezberdinak izan du: batzuentzat aktorek lar exajeratzen zuen, beste batzuentzat aspergarria izan zen, eta askorentzat barregarria. Iritzi ezberdinak izan ditugu.



DATORREN URTEARI BEGIRA…

      Ikastetxean hausnarketa lanak egin beharko ditugu hainbat ekitaldietan gertatu dena ekiditeko. Orokorrean zenbait ekitaldi primeran atera dira, beste batzuek ordea ez. Ikasiko dugu.

      2013.urtean KORRIKA izango dugu gure artean. Jarduera berriak, ekitaldi eta artista berriak...Izango ote dira gure ikasleak PROTAGONISTAK???

                                                                                                                                   HNP


No hay comentarios:

Publicar un comentario