2017/01/25

ZORIONAK EZTIZEN, TXAPELDUN


ZORIONAK EZTIZEN, TXAPELDUN

Mungiako TAKET bertso eskolak San Antontxu bertso paper lehiaketaren XIX. edizioa antolatu du aurten. Bi maila bereizi dira aurten ere:  alde batetik gazteak (18 urtera arte) eta bestetik helduak (18 urtetik gorakoak)


Honakoa zen egin beharreko lana: gazteek gutxienez sei bertso eta gehienez zortzi osatu behar zituzten, eta helduek, gutxienez zortzi eta gehienez hamabi. Bi mailetan, gaia, doinua, eta neurria libreak ziren.
Lanak posta elektroniko bidez bidali behar ziren 2016ko abenduaren 31 baino lehen, eta sari banaketa 2017ko urtarrilaren 15ean Mungiako bertso eskolak antolaturiko bertso saioaren amaieran egin zen. Bertso saioan Etxahun Lekue, Sustrai Colina, Aitor Mendiluze eta Mikel Goiriena ibili ziren kantari.



Hauek izan ziren sariak:

Gazteen mailan:
·         Lehenengo saria: 150 € eta TAKETA. (Eztizen Artola Iturrate)
·         Bigarren saria: 100 € eta oroigarria. (Julene Iturbe)
·         Hirugarren saria: 75 € eta oroigarria. (Aner Peritz)
·         Aipamen berezia: Nere Ibinaga.

Helduen mailan:
·         Lehenengo saria: 300 € eta TAKETA. (Amaia Agirre)
·         Bigarren saria: 200 € eta oroigarria. (Ane Labaka)
·         Hirugarren saria: 100 € eta oroigarria. (Moises Enbeita)
·         Aipamen bereziak: Aitor Esteban, Iraitz Bilbao eta Beñat Barainka.

Hona hemen Eztizen Artola Iturrate gure ikaslearen bertso sorta irabazlea:


EDABEA (ezizena: xuxurla)


Hasieran dena zen berria
Dena poza ta algara,
Bihurrikeri, pasio eta
Bion arteko zirrara.
eta azkartzen joan zitzaigun
Maitasunaren taupada,
Ez zen besterik, biok bakarrik,
Mundua genuen laga.
baina denbora igaro ta non
Dago gu bion islada
Banatzen hasi gara eta nik
Sentitua dut dardara.
ilusioa berreskuratu
dezakegu beharbada
Pasa dezagun besarkatuta
Goxo-goxo gaurko gaba.

Sortu genuen egun beretik
Izan ginen zutabea
Famili eder ta handi honen
Babesgune, pilarea.
Urteetako lanek bihurtu
baitute paregabea.
Talde honetan partaide gara
Amama zein nerabea;
Handitzen goaz eta horrela,
Handitzen doa sarea.
Laguntza eska diezaiegun
Aitzakiarik gabea
Denon artean topa dezagun
Honen aterabidea,
Bion arteko sua piztuta
Mantentzeko edabea.

Maitalerik ez, harremanik ez,
Jada ez dugu lagunik.
Mila galdera izanda ere,
Ez daukate erantzunik.
Bizi osoa batera egin,
elkar laguntza emanik.
Pasiorik ez, desiorik ez
Ez daukat itxaropenik.
eta txarrena da egoerak
ez duela errudunik
Ba al dago irtenbideren bat,
Konponbidea duenik?
Etxe honetan aspaldidanik
Ez baitago zorionik.
eta ez dakit bizitzak zentzu
askorik duen jadanik.


Azkenaldian zure pausoei
Diet nik erreparatu
Galduta zaude, noraezean,
Atzo nintzen konturatu
Memoria deitu ohi duguna
Egin zaizu delikatu
Ahanzturak zu hautatu zaitu,
Zu egin zaitu kolpatu.
Aurrean duzun gaixotasuna
Ezin dugu alboratu
Izan ere, gure biziak
Egingo dira mugatu.
baina irrifar batekin indar
asko daitezkenez batu
seguru nago zure barnean
ezingo nauzula ahaztu.

Hamaika negu ta udaberri
Eman ditugu batera
Urtero pozez, urtero alai,
Urtero beti antzera.
Lagunartean bakardadea
leunago da gainera
Negu hotz denak, izotz bihurtu
Bailirateke ostera.
Oharkabean zahartu gara
hurbil dago bukaera,
Heriotza hurbiltzen hasi da
Hona hemen akabera.
ta mila aldiz errepikatu
dut neurekiko galdera
Gutariko bat hilko denean,
Zer gertatuko ote da?

Zer iruditzen zaizu laztana;
Bagoaz pasiatzera,
Bilbo zaharraren zirrikituak
Berriro ezagutzera.
Betikoari agur esanez
Mundutik bidaiatzera,
Gazte-aroko pasadizuak
Elkarrekin oroitzera.
Mundua ahaztuz, tartetxo batez,
Errutina agurtzera,
Ezinbesteko dugun dosiaz,
Gure denbora hartzera.
eguneroko oztopoei
irribarre bat jartzera
orain arteko amets guztiak
Behingoz egi bihurtzera!

Doinua: Martxa baten lehen notak

SOLOKOETXE BHI




2017/01/24

SANTO TOMAS



SANTO TOMAS      
                                                                                                      
                                      
Santo Tomas eguna abenduaren 21ean ospatzen da Bilbon, eta aurten asteazken batean izan da.
 Egun horretan, oraindik klasea geneukan eta betiko moduan eskola berdinak eman genituen, baina bigarren saioan, Miren eta Leire, gure tutoreak, gure bila etorri ziren Santo Tomas azokara joateko. Ze poza!!

Guztiok irten ginen institututik, 2. mailako gela biak. Irakasleen baldintzatariko bat zen denok gure taldean joan behar ginela  eta fitxa bat geneukan betetzeko. Nahi genituen fitxako galdera batzuk aukeratu behar genituen erantzuteko.

Arlo guztietako galderak zeuden, batzuk ingeleraz, eta niri eta nire taldeari asko gustatu zitzaizkigun ingeleraz zeuden galderak, beraz, horiek aukeratu genituen.

Miren, Leire, Britt et Alexekin (kanadarra) joan ginen Unamuno plazaraino eta bertan, gure kabuz,  azokaren eremutik ibili ahal izan ginen, baina hori bai, beti gure taldekideekin.

Nire taldea eta ni (Nora, Larraitz…) Plaza berrira joan ginen eta gozoki batzuk erosi ondoren, Plaza Berriaren ondoan dagoen San Nikolas elizan kokatu ginen. Kanpoaldean, turista batzuk zeuden eta beraiekin hitz egiten saiatu ginen baina ezin, ez ginen ulertzen. Ostean, Plaza Berriaren erdialdean eta denden artean, emakume batekin eta bere senarrarekin hizketan hasi ginen ingeleraz, Ingalaterrakoak zirelako. Galdera batzuk egin genizkien, batzuk ez zekizkiten baina gehienak erantzun ahal izan genituen.

10:20an Unamuno plazara itzuli behar ginen berriro, orduan, irakasleak etorri ziren eta oso argazki polita atera genuen bi gelak elkarrekin.

Oso oroimen ona dut egun horretaz, Miren eta Leireri esker, institututik kanpo egon ginen eta jai honen inguruan gauza asko ikasi genuen. Horretaz gain, talo gozo-gozo bat jan genuen San Tomasen omenez.

                                                                                               Egilea: Duaa El Hachioui (2.A)