“BIBA VOI” ANTZERKI SAIOA
Pasa den
ostegunean, martxoaren 15ean, institutuko areto nagusian eta euskara asteko
ospakizunen artean aurkeztu zen “Biba voi” antzezlana.
Egilea Mikel
Martinez aktorea da eta Dario Foren eta Franca Rame senar-emazteen testu batzuk
aukeratu ditu, antzerkigile italiarroi egindako omenaldi gisa. Berak eta Irati
Agirreazkuenagak daramatzate eszenara testu horiek, bai irakurraldi
dramatizatuaren bidez, bai bakarrizketa antzeztuetan. Pistolaren
Begi Zuri Beltzak, Misterio Bufo, Anarkista baten ezusteko heriotza,
Tutta casa, letto e chiesa... Testu zorrotz eta
zirikatzaileekin gozatzeko aukera aparta.
2016ko urrian
joan zitzaigun Dario Fo, eta Franca Rame 2013ko maiatzean. Bi antzerkigile
handi horien ironiak eta salaketek gaurkotasunik ez dute galdu. Inoiz baino
beharrezkoagoak izan daitezke gaur egun.
Batxilergoko
ikasleei zuzenduta egon zen eta isilean jarraitu zuten gazteek.
No hay comentarios:
Publicar un comentario